wahshat hai mere dil ko to tadbir-e-wasl kar

vahshat hai mere dil ko to tadbīr-e-vasl kar

paañv meñ us ġhazāl ke zanjīr-e-vasl kar

zaḳhmī shikār huuñ maiñ tirā mar hī jā.ūñgā

pahlū se mat judā tū mire tīr-e-vasl kar

ik lahza terī bātoñ se aatā hai dil ko chain

hamdam ḳhudā ke vāste taqrīr-e-vasl kar

dast-e-darāz apne ko tauq-e-gulū mirā

tū ek dam to ai ḳham-e-shamshīr-e-vasl kar

ai mah ye terī dūr-kashī kab talak bhalā

ik shab to tū irāda-e-shab-gīr-e-vasl kar

siina pe siina ḳhisht pe goyā ki ḳhisht hai

ab ai falak nazāra-e-ta.amīr-e-vasl kar

tohmat lagegī paas biThāne se fā.eda

nāhaq na mujh ko mūrid-e-taqsīr-e-vasl kar

mat chāñdnī meñ aa ki zamāna ġhayūr hai

is kaam ko supurd-e-shab-e-qīr-e-vasl kar

shāyad ki paḌh ke narm ho dil us kā 'mus.hafī'

jā kar havāle us ke ye tahrīr-e-vasl kar

wahshat hai mere dil ko to tadbir-e-wasl kar

panw mein us ghazal ke zanjir-e-wasl kar

zaKHmi shikar hun main tera mar hi jaunga

pahlu se mat juda tu mere tir-e-wasl kar

ek lahza teri baaton se aata hai dil ko chain

hamdam KHuda ke waste taqrir-e-wasl kar

dast-e-daraaz apne ko tauq-e-gulu mera

tu ek dam to ai KHam-e-shamshir-e-wasl kar

ai mah ye teri dur-kashi kab talak bhala

ek shab to tu irada-e-shab-gir-e-wasl kar

sina pe sina KHisht pe goya ki KHisht hai

ab ai falak nazara-e-tamir-e-wasl kar

tohmat lagegi pas biThane se faeda

nahaq na mujh ko murid-e-taqsir-e-wasl kar

mat chandni mein aa ki zamana ghayur hai

is kaam ko supurd-e-shab-e-qir-e-wasl kar

shayad ki paDh ke narm ho dil us ka 'mushafi'

ja kar hawale us ke ye tahrir-e-wasl kar