wahshat mein bhi ruKH jaanib-e-sahra na karenge

vahshat meñ bhī ruḳh jānib-e-sahrā na kareñge

jab tak ki tumheñ shahr meñ rusvā na kareñge

ghabrā ga.e betābi-e-dil dekh ke ai jaan

Thahro to abhī hijr meñ kyā kyā na kareñge

mar jā.ūñ to mar jā.ūñ burā māneñ to māneñ

phir kaise masīhā haiñ jo achchhā na kareñge

vo husn meñ kāmil haiñ to ham sabr meñ yaktā

tā umr kabhī zikr bhī un kā na kareñge

chhup chhup ke kaheñge jo chhupāne ke suḳhan haiñ

ham tum se kisī baat kā parda na kareñge

badnāmī se Darte ho abas ishq meñ ai 'barq'

kab tak bashar is baat kā charchā na kareñge

wahshat mein bhi ruKH jaanib-e-sahra na karenge

jab tak ki tumhein shahr mein ruswa na karenge

ghabra gae betabi-e-dil dekh ke ai jaan

Thahro to abhi hijr mein kya kya na karenge

mar jaun to mar jaun bura manen to manen

phir kaise masiha hain jo achchha na karenge

wo husn mein kaamil hain to hum sabr mein yakta

ta umr kabhi zikr bhi un ka na karenge

chhup chhup ke kahenge jo chhupane ke suKHan hain

hum tum se kisi baat ka parda na karenge

badnami se Darte ho abas ishq mein ai 'barq'

kab tak bashar is baat ka charcha na karenge