wahshat mein koi kar-e-numayan na kar sake

vahshat meñ koī kār-e-numāyāñ na kar sake

dāman ko jeb jeb ko dāmāñ na kar sake

dard-e-darūñ kā vo bhī to darmāñ na kar sake

dushvārī-e-hayāt ko āsāñ na kar sake

tar ḳhūn-e-dil se nāvak-e-jānāñ na kar sake

ham itnī bhī to ḳhātir-e-mehmāñ na kar sake

kuchh aise jald ḳhatm hue zindagī ke din

ham e.atibār-e-umr-e-gurezāñ na kar sake

dariyā meñ ġharq dekhne vaale bhī ho ga.e

mujh ko magar havāla-e-tūfāñ na kar sake

jalvoñ ko dekhtī rahī merī nigāh-e-shauq

kuchh bhī harīm-e-nāz ke darbāñ na kar sake

rahte hue qafas meñ zamāna guzar ga.e

tark-e-ḳhayāl-e-sair-e-gulistāñ na kar sake

sau hashr intizār meñ ham par guzar ga.e

aur aa.ī ek hashr kā sāmāñ na kar sake

vo saḳht-jān the ki zamāne ke hādsāt

shīrāza-e-hayāt pareshāñ na kar sake

ham aise jā ke be-ḳhud-e-ehsās ho ga.e

andāza-e-kashākash-e-zindāñ na kar sake

badnām kar diyā mujhe 'afqar' zamāne meñ

iḳhfā-e-rāz dīda-e-giryāñ na kar sake

wahshat mein koi kar-e-numayan na kar sake

daman ko jeb jeb ko daman na kar sake

dard-e-darun ka wo bhi to darman na kar sake

dushwari-e-hayat ko aasan na kar sake

tar KHun-e-dil se nawak-e-jaanan na kar sake

hum itni bhi to KHatir-e-mehman na kar sake

kuchh aise jald KHatm hue zindagi ke din

hum eatibar-e-umr-e-gurezan na kar sake

dariya mein gharq dekhne wale bhi ho gae

mujh ko magar hawala-e-tufan na kar sake

jalwon ko dekhti rahi meri nigah-e-shauq

kuchh bhi harim-e-naz ke darban na kar sake

rahte hue qafas mein zamana guzar gae

tark-e-KHayal-e-sair-e-gulistan na kar sake

sau hashr intizar mein hum par guzar gae

aur aai ek hashr ka saman na kar sake

wo saKHt-jaan the ki zamane ke hadsat

shiraaza-e-hayat pareshan na kar sake

hum aise ja ke be-KHud-e-ehsas ho gae

andaza-e-kashakash-e-zindan na kar sake

badnam kar diya mujhe 'afqar' zamane mein

iKHfa-e-raaz dida-e-giryan na kar sake