wahshat thi hamein bhi wahi ghar-bar se ab tak

vahshat thī hameñ bhī vahī ghar-bār se ab tak

sar maare haiñ apne dar o dīvār se ab tak

marte hī sunā un ko jinheñ dil-lagī kuchh thī

achchhā huā koī is āzār se ab tak

jab se lagī haiñ āñkheñ khulī raah take haiñ

so.e nahīñ saath us ke kabhū pyaar se ab tak

aayā thā kabhū yaar so māmūl ham us ke

bistar pe gire rahte haiñ bīmār se ab tak

bad-ahdiyoñ meñ vaqt-e-vafāt aan bhī pahuñchā

vaada na huā ek vafā yaar se ab tak

hai qahr o ġhazab dekh taraf kushte ke zālim

kartā hai ishārat bhī tū talvār se ab tak

kuchh ranj-e-dilī 'mīr' javānī meñ khiñchā thā

zardī nahīñ jaatī mire ruḳhsār se ab tak

wahshat thi hamein bhi wahi ghar-bar se ab tak

sar mare hain apne dar o diwar se ab tak

marte hi suna un ko jinhen dil-lagi kuchh thi

achchha hua koi is aazar se ab tak

jab se lagi hain aankhen khuli rah take hain

soe nahin sath us ke kabhu pyar se ab tak

aaya tha kabhu yar so mamul hum us ke

bistar pe gire rahte hain bimar se ab tak

bad-ahdiyon mein waqt-e-wafat aan bhi pahuncha

wada na hua ek wafa yar se ab tak

hai qahr o ghazab dekh taraf kushte ke zalim

karta hai ishaarat bhi tu talwar se ab tak

kuchh ranj-e-dili 'mir' jawani mein khincha tha

zardi nahin jati mere ruKHsar se ab tak