وحشت تھی وہ کہ اپنا گریباں نہیں رہا

وحشت تھی وہ کہ اپنا گریباں نہیں رہا

ایسی چلی ہوا کہ چراغاں نہیں رہا

تجھ کو بھلا دوں ایسا کچھ امکان تو نہیں

پر دل میں تیری یاد کا ارماں نہیں رہا

ہر بار گردشوں کی نظر مجھ پہ ہی پڑی

حیراں ہوا ہوں یوں کہ میں حیراں نہیں رہا

اک چارہ گر کی چارہ گری کا کمال ہے

کانٹا کوئی قرین رگ جاں نہیں رہا

گر کچھ کرم کئے تو ستم اس سے بھی سوا

دنیا کا مجھ پہ اب کوئی احساں نہیں رہا

گو چھن گئی قبا مری دستار بھی گئی

رب کا کرم رہا کہ میں عریاں نہیں رہا