wahshat thi wo ki apna gareban nahin raha

vahshat thī vo ki apnā garebāñ nahīñ rahā

aisī chalī havā ki charāġhāñ nahīñ rahā

tujh ko bhulā duuñ aisā kuchh imkān to nahīñ

par dil meñ terī yaad kā armāñ nahīñ rahā

har baar gardishoñ kī nazar mujh pe hī paḌī

hairāñ huā huuñ yuuñ ki maiñ hairāñ nahīñ rahā

ik chārāgar kī chāragarī kā kamāl hai

kāñTā koī qarīn-e-rag-e-jāñ nahīñ rahā

gar kuchh karam kiye to sitam us se bhī sivā

duniyā kā mujh pe ab koī ehsāñ nahīñ rahā

go chhin ga.ī qabā mirī dastār bhī ga.ī

rab kā karam rahā ki maiñ uryāñ nahīñ rahā

wahshat thi wo ki apna gareban nahin raha

aisi chali hawa ki charaghan nahin raha

tujh ko bhula dun aisa kuchh imkan to nahin

par dil mein teri yaad ka arman nahin raha

har bar gardishon ki nazar mujh pe hi paDi

hairan hua hun yun ki main hairan nahin raha

ek chaaragar ki chaaragari ka kamal hai

kanTa koi qarin-e-rag-e-jaan nahin raha

gar kuchh karam kiye to sitam us se bhi siwa

duniya ka mujh pe ab koi ehsan nahin raha

go chhin gai qaba meri dastar bhi gai

rab ka karam raha ki main uryan nahin raha