wahshat-zadon ki kitni dilchasp hain adaen

vahshat-zadoñ kī kitnī dilchasp haiñ adā.eñ

kuchh der ḳhuun ro.eñ kuchh der muskurā.eñ

hairān haiñ kidhar ham bahr-e-talāsh jaa.eñ

aatī haiñ har taraf se un kī hī ab sadā.eñ

gūñjī huiiñ haiñ mere nāloñ se ye fazā.eñ

yā kaalī kaalī rāteñ kartī haiñ saa.eñ saa.eñ

us vaqt ḳhaas rahrav himmat na haar jaa.eñ

manzil qarīb samjheñ jab paañv Dagmagā.eñ

ye dekhnā hai mujh par kyā bijliyāñ girā.eñ

badlī to haiñ havā.eñ uTThī to haiñ ghaTā.eñ

uf sharmgīñ nigāheñ bārbād-kun adā.eñ

ye nīmche kisī ke dil meñ na Duub jaa.eñ

ab hichkiyāñ banī haiñ ruḳh naza.a meñ badal kar

māyūs ārzūeñ nākām iltijā.eñ

dil kī tabāhiyoñ par masrūr hone vaale

dil hī na ho to tere jalve kahāñ samā.eñ

pahle hī sochte tum aahoñ kā ab gila kyā

jo bañdh ga.iiñ havā.eñ vo bañdh ga.iiñ havā.eñ

maiñ lafz-e-dost sun kar Dartā huuñ dil hī dil meñ

vo mujh se 'abr' kī haiñ ahbāb ne daġhā.eñ

wahshat-zadon ki kitni dilchasp hain adaen

kuchh der KHun roen kuchh der muskuraen

hairan hain kidhar hum bahr-e-talash jaen

aati hain har taraf se un ki hi ab sadaen

gunji huin hain mere nalon se ye fazaen

ya kali kali raaten karti hain saen saen

us waqt KHas rahraw himmat na haar jaen

manzil qarib samjhen jab panw Dagmagaen

ye dekhna hai mujh par kya bijliyan giraen

badli to hain hawaen uTThi to hain ghaTaen

uf sharmgin nigahen barbaad-kun adaen

ye nimche kisi ke dil mein na Dub jaen

ab hichkiyan bani hain ruKH naza mein badal kar

mayus aarzuen nakaam iltijaen

dil ki tabahiyon par masrur hone wale

dil hi na ho to tere jalwe kahan samaen

pahle hi sochte tum aahon ka ab gila kya

jo bandh gain hawaen wo bandh gain hawaen

main lafz-e-dost sun kar Darta hun dil hi dil mein

wo mujh se 'abr' ki hain ahbab ne daghaen