wahshaton ko bhi ab kamal kahan

vahshatoñ ko bhī ab kamāl kahāñ

ab junūñ kār-e-be-misāl kahāñ

ḳhud se bhī māñgtī nahīñ ḳhud ko

tujh se phir ḳhvāhish-e-savāl kahāñ

mere ham-rañg pairahan pahne

shaam aisī shikasta-hāl kahāñ

sub.h kī bhiiḌ meñ kahūñ kis se

ho ga.ī raat pā.emāl kahāñ

merī sab hālatoñ ko jaan sake

koī aisā sharīk-e-hāl kahāñ

tere ḳhvāboñ ke baa'd āñkhoñ meñ

ho sake raushnī bahāl kahāñ

be-irāda jo baḳhsh dī tū ne

is ḳhushī kā tujhe ḳhayāl kahāñ

DhūñDte DhūñDte maiñ thak bhī ga.ī

kho ga.e mere māh-o-sāl kahāñ

wahshaton ko bhi ab kamal kahan

ab junun kar-e-be-misal kahan

KHud se bhi mangti nahin KHud ko

tujh se phir KHwahish-e-sawal kahan

mere ham-rang pairahan pahne

sham aisi shikasta-haal kahan

subh ki bhiD mein kahun kis se

ho gai raat paemal kahan

meri sab haalaton ko jaan sake

koi aisa sharik-e-haal kahan

tere KHwabon ke ba'd aankhon mein

ho sake raushni bahaal kahan

be-irada jo baKHsh di tu ne

is KHushi ka tujhe KHayal kahan

DhunDte DhunDte main thak bhi gai

kho gae mere mah-o-sal kahan