wajd mein mauj-e-saba hai shayad

vajd meñ mauj-e-sabā hai shāyad

phir koī naġhma-sarā hai shāyad

dil masarrat se judā hai shāyad

vo nazar mujh se ḳhafā hai shāyad

qāfila bhaTkā huā hai shāyad

rāhzan rāh-numā hai shāyad

is tarah zahr-e-ġham-e-dil piinā

jurm-e-ulfat kī sazā hai shāyad

rahrav-e-shauq ko manzil na milī

rāsta bhuul gayā hai shāyad

tere ehsās kā ai jān-e-vafā

aa.ina TuuT gayā hai shāyad

bekalī dard-e-jigar soz-e-vafā

merī qismat kā likhā hai shāyad

ġham se mānūs hai is vāste dil

ġham mohabbat kā sila hai shāyad

mere hamrāh rah-e-ulfat meñ

rañg-o-nik.hat kī fazā hai shāyad

har-nafas par ye gumāñ hotā hai

tū mere dil kī sadā hai shāyad

chheḌ kar pyaar ke naġhmoñ ko 'nigār'

saaz ḳhāmosh huā hai shāyad

wajd mein mauj-e-saba hai shayad

phir koi naghma-sara hai shayad

dil masarrat se juda hai shayad

wo nazar mujh se KHafa hai shayad

qafila bhaTka hua hai shayad

rahzan rah-numa hai shayad

is tarah zahr-e-gham-e-dil pina

jurm-e-ulfat ki saza hai shayad

rahraw-e-shauq ko manzil na mili

rasta bhul gaya hai shayad

tere ehsas ka ai jaan-e-wafa

aaina TuT gaya hai shayad

bekali dard-e-jigar soz-e-wafa

meri qismat ka likha hai shayad

gham se manus hai is waste dil

gham mohabbat ka sila hai shayad

mere hamrah rah-e-ulfat mein

rang-o-nikhat ki faza hai shayad

har-nafas par ye guman hota hai

tu mere dil ki sada hai shayad

chheD kar pyar ke naghmon ko 'nigar'

saz KHamosh hua hai shayad