وجود بے حقیقت پر نہ اتنا شادماں ہوتا

وجود بے حقیقت پر نہ اتنا شادماں ہوتا

جو اسرار حقیقت کا بھی انساں رازداں ہوتا

مجھے تیری خوشی تھی کیوں غم سود و زیاں ہوتا

ترے ہوتے جو یہ ہوتا تو جینا رائیگاں ہوتا

چمن میں ان کی بربادی پہ کہئے میں کہاں ہوتا

اگر ان چار تنکوں پر مدار آشیاں ہوتا

مجھے پروا نہیں ہوتی تو یہ سب کچھ کہاں ہوتا

کدھر دور بہار آتی کہاں روز خزاں ہوتا

نئے انداز سے کچھ شکوۂ جور بتاں ہوتا

نئی طرز فغاں ہوتی نیا رنگ بیاں ہوتا

وفور شوق سجدہ میں کہاں سر پھوڑتے جا کر

جو اپنے سامنے ان کا نہ سنگ آستاں ہوتا

خزاں کا دور ہی رہتا تو اچھا تھا چمن والو

نہ گلشن میں بہار آتی نہ کوئی بد گماں ہوتا

مصائب کا زمانہ آتا جاتا ہے تو اچھا ہے

عذاب زندگی ہوتا اگر یہ جاوداں ہوتا

یہ سارا اپنی کمزوری سے دور ناتوانی ہے

بڑھاپا آ کے کیا لیتا اگر عزم جواں ہوتا

مٹا لے آسماں بے سر پرستی بزم ہستی ہے

تری پیری نہیں چلتی اگر پیر مغاں ہوتا

خیال آتا ہے جب دنیا مری باتوں پہ ہنستی ہے

جہان زیست میں اپنا بھی کوئی راز داں ہوتا

برائی سے اگر دامن کو خوشترؔ ہم بچا لیتے

تو اس تعمیر نو سے دور خوشحالی عیاں ہوتا