wajud-e-be-haqiqat par na itna shadman hota

vajūd-e-be-haqīqat par na itnā shādmāñ hotā

jo asrār-e-haqīqat kā bhī insāñ rāz-dāñ hotā

mujhe terī ḳhushī thī kyoñ ġham-e-sūd-o-ziyāñ hotā

tire hote jo ye hotā to jiinā rā.egāñ hotā

chaman meñ in kī barbādī pe kahiye maiñ kahāñ hotā

agar in chaar tinkoñ par madār-e-āshiyāñ hotā

mujhe parvā nahīñ hotī to ye sab kuchh kahāñ hotā

kidhar daur-e-bahār aatī kahāñ roz-e-ḳhizāñ hotā

na.e andāz se kuchh shikva-e-jaur-e-butāñ hotā

na.ī tarz-e-fuġhāñ hotī nayā rang-e-bayāñ hotā

vufūr-e-shauq-e-sajda meñ kahāñ sar phoḌte jā kar

jo apne sāmne un kā na sang-e-āstāñ hotā

ḳhizāñ kā daur hī rahtā to achchhā thā chaman vaalo

na gulshan meñ bahār aatī na koī bad-gumāñ hotā

masā.ib kā zamāna aatā jaatā hai to achchhā hai

azāb-e-zindagī hotā agar ye jāvedāñ hotā

ye saarā apnī kamzorī se daur-e-nā-tavānī hai

buḌhāpā aa ke kyā letā agar azm-e-javāñ hotā

miTā le āsmāñ be-sarparastī bazm-e-hastī hai

tirī piirī nahīñ chaltī agar pīr-e-muġhāñ hotā

ḳhayāl aatā hai jab duniyā mirī bātoñ pe hañstī hai

jahān-e-zīst meñ apnā bhī koī rāzdāñ hotā

burā.ī se agar dāman ko 'ḳhushtar' ham bachā lete

to is tāmīr-e-nau se daur-e-ḳhush-hālī ayaañ hotā

wajud-e-be-haqiqat par na itna shadman hota

jo asrar-e-haqiqat ka bhi insan raaz-dan hota

mujhe teri KHushi thi kyon gham-e-sud-o-ziyan hota

tere hote jo ye hota to jina raegan hota

chaman mein in ki barbaadi pe kahiye main kahan hota

agar in chaar tinkon par madar-e-ashiyan hota

mujhe parwa nahin hoti to ye sab kuchh kahan hota

kidhar daur-e-bahaar aati kahan roz-e-KHizan hota

nae andaz se kuchh shikwa-e-jaur-e-butan hota

nai tarz-e-fughan hoti naya rang-e-bayan hota

wufur-e-shauq-e-sajda mein kahan sar phoDte ja kar

jo apne samne un ka na sang-e-astan hota

KHizan ka daur hi rahta to achchha tha chaman walo

na gulshan mein bahaar aati na koi bad-guman hota

masaib ka zamana aata jata hai to achchha hai

azab-e-zindagi hota agar ye jawedan hota

ye sara apni kamzori se daur-e-na-tawani hai

buDhapa aa ke kya leta agar azm-e-jawan hota

miTa le aasman be-sarparasti bazm-e-hasti hai

teri piri nahin chalti agar pir-e-mughan hota

KHayal aata hai jab duniya meri baaton pe hansti hai

jahan-e-zist mein apna bhi koi raazdan hota

burai se agar daman ko 'KHushtar' hum bacha lete

to is tamir-e-nau se daur-e-KHush-haali ayan hota