wajud-e-dard rahta hai koi surat ho darman ki

vajūd-e-dard rahtā hai koī sūrat ho darmāñ kī

ki tark-e-ārzū par bhī ḳhalish baaqī hai armāñ kī

tamanna aur tamanna bhī sukūn-e-dard-e-hijrāñ kī

bhalā tā۔bīr kyā honī thī ik ḳhvāb-e-pareshāñ kī

dil-e-be-bāk zabt-e-shauq kā pahle na qaa.il thā

mohabbat asl meñ fitrat badal detī hai insāñ kī

zamāna kuchh kahe mujh ko zamāne se ġharaz kyā hai

zarā tum bhī to socho maiñ ne kyoñ hālat pareshāñ kī

haqīqat meñ tumheñ kuchh mujh se zid sī ho ga.ī varna

kabhī kāfir ke muñh se bhī nikal jaatī hai īmāñ kī

ḳhudā jaane junūn-e-shauq kā anjām kyā hogā

agar un tak ḳhabar pahuñchī mire hāl-e-pareshāñ kī

agar qalb-e-junūñ-mashrab sharīk-e-hāl hai 'naḳhshab'

to ham se ho chukīñ pābandiyāñ ādāb-e-zindāñ kī

wajud-e-dard rahta hai koi surat ho darman ki

ki tark-e-arzu par bhi KHalish baqi hai arman ki

tamanna aur tamanna bhi sukun-e-dard-e-hijran ki

bhala ta۔bir kya honi thi ek KHwab-e-pareshan ki

dil-e-be-bak zabt-e-shauq ka pahle na qail tha

mohabbat asl mein fitrat badal deti hai insan ki

zamana kuchh kahe mujh ko zamane se gharaz kya hai

zara tum bhi to socho main ne kyon haalat pareshan ki

haqiqat mein tumhein kuchh mujh se zid si ho gai warna

kabhi kafir ke munh se bhi nikal jati hai iman ki

KHuda jaane junun-e-shauq ka anjam kya hoga

agar un tak KHabar pahunchi mere haal-e-pareshan ki

agar qalb-e-junun-mashrab sharik-e-haal hai 'naKHshab'

to hum se ho chukin pabandiyan aadab-e-zindan ki