wajud garche mera KHak-e-muKHtasar se uTha

vajūd garche mirā ḳhāk-e-muḳhtasar se uThā

mah-o-nujūm kā halqa mirī sharar se uThā

badal gayā hai mirī kisht-e-jāñ ḳharābe meñ

vo hashr jo ki tirī chashm-e-fitnagar se uThā

junūn-e-shauq to har pal hai goyā pā-ba-rikāb

takān kahtī hai ab paaoñ ko safar se uThā

sharāb-e-vasl kī mad.hoshī hai rag-o-pai meñ

asīr-e-zulf ko ab husn ke asar se uThā

na qat.a kī hai zarūrat na ehtiyāj-e-qafas

yaqīn hī jo parinde kā bāl-o-par se uThā

mah-o-nujūm mire baḳht par the rashk-kunāñ

ġhubār ban ke maiñ jab terī rah-guzar se uThā

savāl-e-nazr-e-karam kyā ki terī diid ke ba.ad

maiñ be-murād kahāñ tere sang-e-dar se uThā

laraz ke rah gayā qātil bhī chand saa.at ko

jab irti.āsh mire jism-e-be-asar se uThā

tamām umr rahī us kī justujū 'ḳhāvar'

jo dard ban ke kabhī dil kabhī jigar se uThā

wajud garche mera KHak-e-muKHtasar se uTha

mah-o-nujum ka halqa meri sharar se uTha

badal gaya hai meri kisht-e-jaan KHarabe mein

wo hashr jo ki teri chashm-e-fitnagar se uTha

junun-e-shauq to har pal hai goya pa-ba-rikab

takan kahti hai ab paon ko safar se uTha

sharab-e-wasl ki madhoshi hai rag-o-pai mein

asir-e-zulf ko ab husn ke asar se uTha

na qata ki hai zarurat na ehtiyaj-e-qafas

yaqin hi jo parinde ka baal-o-par se uTha

mah-o-nujum mere baKHt par the rashk-kunan

ghubar ban ke main jab teri rah-guzar se uTha

sawal-e-nazr-e-karam kya ki teri did ke baad

main be-murad kahan tere sang-e-dar se uTha

laraz ke rah gaya qatil bhi chand saat ko

jab irtiash mere jism-e-be-asar se uTha

tamam umr rahi us ki justuju 'KHawar'

jo dard ban ke kabhi dil kabhi jigar se uTha