wajud KHwab mein Dhal kar niDhaal thoDi hai

vajūd ḳhvāb meñ Dhal kar niDhāl thoḌī hai

mire shu.ūr meñ itnī majāl thoḌī hai

zamāna biit gayā ḳhud se rasm-o-rāh kiye

hamārā ḳhud se ta.alluq bahāl thoḌī hai

mire zamīn se uThte hue vajūd ko dekh

ye raqs-e-vajd hai pāgal dhamāl thoḌī hai

har ik maqām pe qaa.em rahe haiñ hosh-o-havās

hamārī qais ke jaisī misāl thoḌī hai

atā huī hai kisī dard intihā ke evaz

ye shā.irī mirā apnā kamāl thoḌī hai

ye zindagī hai kisī aur imtihān kā rog

mire nisāb meñ shāmil savāl thoḌī hai

haqā.eq-e-ġham-e-duniyā se mat churā āñkheñ

saroñ pe hijr tanā hai visāl thoḌī hai

hameñ to 'ābdī' shā.ir banā diyā us ne

ye ishq kār-e-suḳhan hai vabāl thoḌī hai

wajud KHwab mein Dhal kar niDhaal thoDi hai

mere shuur mein itni majal thoDi hai

zamana bit gaya KHud se rasm-o-rah kiye

hamara KHud se talluq bahaal thoDi hai

mere zamin se uThte hue wajud ko dekh

ye raqs-e-wajd hai pagal dhamal thoDi hai

har ek maqam pe qaem rahe hain hosh-o-hawas

hamari qais ke jaisi misal thoDi hai

ata hui hai kisi dard intiha ke ewaz

ye shairi mera apna kamal thoDi hai

ye zindagi hai kisi aur imtihan ka rog

mere nisab mein shamil sawal thoDi hai

haqaeq-e-gham-e-duniya se mat chura aankhen

saron pe hijr tana hai visal thoDi hai

hamein to 'abdi' shair bana diya us ne

ye ishq kar-e-suKHan hai wabaal thoDi hai