wajud miT gaya parwanon ke sambhalne tak

vajūd miT gayā parvānoñ ke sambhalne tak

dhuāñ hī uThtā rahā sham.a ke pighalne tak

kise nasīb huī us ke jism kī ḳhushbū

vo mere saath rahā rāsta badalne tak

agar charāg kī lau par zabān rakh detā

zabān jaltī bhī kab tak charāg jalne tak

jahāñ bhī Thahroge ruk jā.egā tumhārā vajūd

tumhāre saath chalegā tumhāre chalne tak

abhī se raah meñ nazreñ bichhā ke mat baiTho

palaT ke aa.egā vo āftāb Dhalne tak

havā kā kyā hai na jaane ye kab badal jaa.e

badal chukegā zamāna tire badalne tak

sukūn kis ko milā zindagī kī rāhoñ meñ

ġhubār uThtā rahā qāfila nikalne tak

wajud miT gaya parwanon ke sambhalne tak

dhuan hi uThta raha shama ke pighalne tak

kise nasib hui us ke jism ki KHushbu

wo mere sath raha rasta badalne tak

agar charag ki lau par zaban rakh deta

zaban jalti bhi kab tak charag jalne tak

jahan bhi Thahroge ruk jaega tumhaara wajud

tumhaare sath chalega tumhaare chalne tak

abhi se rah mein nazren bichha ke mat baiTho

palaT ke aaega wo aaftab Dhalne tak

hawa ka kya hai na jaane ye kab badal jae

badal chukega zamana tere badalne tak

sukun kis ko mila zindagi ki rahon mein

ghubar uThta raha qafila nikalne tak