waqar apne buzurgon ka zara bhi kam nahin karte

vaqār apne buzurgoñ kā zarā bhī kam nahīñ karte

kabhī ham zālimoñ ke sāmne sar ḳham nahīñ karte

tavāzo ke liye kāñToñ kī in ko paal rakhā hai

safar meñ ham musāfir ābloñ kā ġham nahīñ karte

ham ahl-e-zarf ḳhushiyoñ meñ bhī qaabū ḳhud pe rakhte haiñ

dukhī ho kar bhī dukh se āstīneñ nam nahīñ karte

hamāre lafz zaḳhmoñ ke liye bante to haiñ marham

magar phir bhī masīhā.ī kā da.avā ham nahīñ karte

nazar rakhte haiñ mustaqbil kī jānib ham nazar vaale

kabhī guzre zamānoñ ke liye mātam nahīñ karte

falak vāloñ kī jānib un kī saarī mehrbānī hai

ġharīboñ par tavajjoh qibla-e-ālam nahīñ karte

kitāboñ se bhare bastoñ ne kuchh aisā dabāyā hai

'niyāz' is daur ke bachche bahut ūdham nahīñ karte

waqar apne buzurgon ka zara bhi kam nahin karte

kabhi hum zalimon ke samne sar KHam nahin karte

tawazo ke liye kanTon ki in ko pal rakha hai

safar mein hum musafir aablon ka gham nahin karte

hum ahl-e-zarf KHushiyon mein bhi qabu KHud pe rakhte hain

dukhi ho kar bhi dukh se aastinen nam nahin karte

hamare lafz zaKHmon ke liye bante to hain marham

magar phir bhi masihai ka dawa hum nahin karte

nazar rakhte hain mustaqbil ki jaanib hum nazar wale

kabhi guzre zamanon ke liye matam nahin karte

falak walon ki jaanib un ki sari mehrbani hai

gharibon par tawajjoh qibla-e-alam nahin karte

kitabon se bhare baston ne kuchh aisa dabaya hai

'niyaz' is daur ke bachche bahut udham nahin karte