waqf kar ke zindagi ki saaten tere liye

vaqf kar ke zindagī kī sā.ateñ tere liye

apne sar liiñ maiñ ne kyā kyā āfateñ tere liye

kar liyā nazzāra-e-husn apnī āñkhoñ par harām

maiñ ne radd kar diiñ nazar kī dāvateñ tere liye

tere milne ke liye mumkin thiiñ jitnī sūrateñ

maiñ ne kar Dālīñ vo saarī sūrateñ tere liye

dushmanoñ kī phabtiyāñ aur dostoñ kī la.an-ta.an

oḌh liiñ duniyā kī saarī la.anteñ tere liye

baiTh kar terī galī meñ baiThne vāloñ ke paas

ḳhaak kar liiñ apnī shaḳhsī azmateñ tere liye

apnī izzat aap karne kā bhī jin ko haq nahīñ

maiñ ne un logoñ kī kī haiñ izzateñ tere liye

apnī ḳhidmat jin se lene maiñ sharāfat ko ho aar

kī haiñ un logoñ kī maiñ ne ḳhidmateñ tere liye

kal jo merī minnateñ karte the apne vāste

aaj maiñ kartā huuñ un kī minnateñ tere liye

tere qadmoñ ke sivā un kī talāfī hī nahīñ

maiñ jo bardāsht kī haiñ zillateñ tere liye

mujh ko jin kī qismatoñ ne kar rakhā thā pā.emāl

rauñd Dālīñ maiñ ne un kī qismateñ tere liye

jin mazāroñ par ḳhudā ke mānñe vaale na jaa.eñ

maiñ ne un par jā ke mānīñ minnateñ tere liye

kufr sharmātā hai jin se jheñptā hai jin se shirk

maiñ ne kī haiñ kaisī kaisī bid.ateñ tere liye

āmiloñ ne farz paḌhvā diiñ namāzeñ saikḌoñ

do kī chaar aur chaar kī do rak.ateñ tere liye

rāhat-e-dārain meñ bhī vo ḳhushī mafqūd hai

jis ḳhushī se maiñ ne jhelīñ āfateñ tere liye

jin meñ hotā thā mire dil par nuzūl-e-vahī-e-sher

vaqf-e-āh-o-nāla haiñ vo sā.ateñ tere liye

kaash tū likkhe ki 'bismil' kuchh ḳhabar bhī hai tujhe

kis qadar ġhamgīñ haiñ merī ḳhalvateñ tere liye

waqf kar ke zindagi ki saaten tere liye

apne sar lin main ne kya kya aafaten tere liye

kar liya nazzara-e-husn apni aankhon par haram

main ne radd kar din nazar ki dawaten tere liye

tere milne ke liye mumkin thin jitni suraten

main ne kar Dalin wo sari suraten tere liye

dushmanon ki phabtiyan aur doston ki lan-tan

oDh lin duniya ki sari lanten tere liye

baiTh kar teri gali mein baiThne walon ke pas

KHak kar lin apni shaKHsi azmaten tere liye

apni izzat aap karne ka bhi jin ko haq nahin

main ne un logon ki ki hain izzaten tere liye

apni KHidmat jin se lene main sharafat ko ho aar

ki hain un logon ki main ne KHidmaten tere liye

kal jo meri minnaten karte the apne waste

aaj main karta hun un ki minnaten tere liye

tere qadmon ke siwa un ki talafi hi nahin

main jo bardasht ki hain zillaten tere liye

mujh ko jin ki qismaton ne kar rakha tha paemal

raund Dalin main ne un ki qismaten tere liye

jin mazaron par KHuda ke manne wale na jaen

main ne un par ja ke manin minnaten tere liye

kufr sharmata hai jin se jhenpta hai jin se shirk

main ne ki hain kaisi kaisi bidaten tere liye

aamilon ne farz paDhwa din namazen saikDon

do ki chaar aur chaar ki do rakaten tere liye

rahat-e-darain mein bhi wo KHushi mafqud hai

jis KHushi se main ne jhelin aafaten tere liye

jin mein hota tha mere dil par nuzul-e-wahi-e-sher

waqf-e-ah-o-nala hain wo saaten tere liye

kash tu likkhe ki 'bismil' kuchh KHabar bhi hai tujhe

kis qadar ghamgin hain meri KHalwaten tere liye