waqt ajib aa gaya mansab-o-jah ke liye

vaqt ajiib aa gayā mansab-o-jāh ke liye

sāhib-e-dil bhī chal paḌe taḳht-o-kulāh ke liye

mire ġhanīm-e-surḳh-rū arsa-e-sad-shikast meñ

koī naved-e-sar-ḳhushī merī sipāh ke liye

us kā hadaf bhī dekhnā merī taraf bhī dekhnā

qatl-e-anā kī shart hai is se nibāh ke liye

mausam-e-gul ko kyā ḳhabar shorish-e-abr-o-bād meñ

tā.ir-e-dil udaas hai shāḳh-e-panāh ke liye

ek navā-e-ātishīñ halqa-ba-halqa jism meñ

phir huī hai tāza-dam taaza gunāh ke liye

kahtā thā koī sham.a-ruḳh dekh mire charāġh-e-shab

koī kiran bachā ke rakh roz-e-siyāh ke liye

ik shab-e-māh ke liye dil hai lahū lahū 'razī'

aañkh sitāra-kesh hai ik shab-e-māh ke liye

waqt ajib aa gaya mansab-o-jah ke liye

sahib-e-dil bhi chal paDe taKHt-o-kulah ke liye

mere ghanim-e-surKH-ru arsa-e-sad-shikast mein

koi nawed-e-sar-KHushi meri sipah ke liye

us ka hadaf bhi dekhna meri taraf bhi dekhna

qatl-e-ana ki shart hai is se nibah ke liye

mausam-e-gul ko kya KHabar shorish-e-abr-o-baad mein

tair-e-dil udas hai shaKH-e-panah ke liye

ek nawa-e-atishin halqa-ba-halqa jism mein

phir hui hai taza-dam taza gunah ke liye

kahta tha koi shama-ruKH dekh mere charagh-e-shab

koi kiran bacha ke rakh roz-e-siyah ke liye

ek shab-e-mah ke liye dil hai lahu lahu 'razi'

aankh sitara-kesh hai ek shab-e-mah ke liye