waqt-e-mushkil hai pa ye waqt guzar jaega

vaqt-e-mushkil hai pa ye vaqt guzar jā.egā

yār-o-aġhyār kā haañ faisla kar jā.egā

Thokareñ gardish-e-ayyām kī gar khā.egā

pyaar kā bhuut tire sar se utar jā.egā

kab talak zabt karegā bhalā sūraj kī tapish

phuul to phuul hai ik roz bikhar jā.egā

muddatoñ baad bhī zinda hai bichhaḌ kar mujh se

bin mire us ne kahā thā ki vo mar jā.egā

shiddat-e-ishq-o-mohabbat meñ kamī aa.egī

yaar kī diid ko tū roz agar jā.egā

rakh ke ādāb-e-duā pesh-e-nazar ai daa.ī

tū duā kar tirā dāman abhī bhar jā.egā

aa.egā aisā burā vaqt bhī sochā hī thā

bechte apnā hunar ahl-e-hunar jā.egā

jaane ghar vāloñ ko kis darja masarrat hogī

sub.h kā bhūlā agar shaam ko ghar jā.egā

tujh ko ho jā.egī duniyā kī haqīqat ma.alūm

jab janāza tirā marqad meñ utar jā.egā

zindagī meñ to palaT kar use dekhā hī nahīñ

bahar-e-tadfīn magar saarā nagar jā.egā

ishq-e-mahbūb kī lazzat ho mayassar jis ko

janib-e-dār bhī be-ḳhauf-o-ḳhatar jā.egā

faisla hogā adālat meñ usī ke haq meñ

bahr-e-qāzī jo liye kīsa-e-zar jā.egā

duur se paanī lagegā pa na hogā paanī

tishna-lab dasht meñ jis samt bhī gar jā.egā

waqt-e-mushkil hai pa ye waqt guzar jaega

yar-o-aghyar ka han faisla kar jaega

Thokaren gardish-e-ayyam ki gar khaega

pyar ka bhut tere sar se utar jaega

kab talak zabt karega bhala suraj ki tapish

phul to phul hai ek roz bikhar jaega

muddaton baad bhi zinda hai bichhaD kar mujh se

bin mere us ne kaha tha ki wo mar jaega

shiddat-e-ishq-o-mohabbat mein kami aaegi

yar ki did ko tu roz agar jaega

rakh ke aadab-e-dua pesh-e-nazar ai dai

tu dua kar tera daman abhi bhar jaega

aaega aisa bura waqt bhi socha hi tha

bechte apna hunar ahl-e-hunar jaega

jaane ghar walon ko kis darja masarrat hogi

subh ka bhula agar sham ko ghar jaega

tujh ko ho jaegi duniya ki haqiqat malum

jab janaza tera marqad mein utar jaega

zindagi mein to palaT kar use dekha hi nahin

bahar-e-tadfin magar sara nagar jaega

ishq-e-mahbub ki lazzat ho mayassar jis ko

janib-e-dar bhi be-KHauf-o-KHatar jaega

faisla hoga adalat mein usi ke haq mein

bahr-e-qazi jo liye kisa-e-zar jaega

dur se pani lagega pa na hoga pani

tishna-lab dasht mein jis samt bhi gar jaega