waqt-e-sahar ek aisi uThi raushni ki bas

vaqt-e-sahar ik aisī uThī raushnī ki bas

jis aañkh ne bhī dekhā yuuñ chuñdhiyā ga.ī ki bas

jī bhar ke is ke baad kiyā raqs maut ne

jaage huoñ ko sub.h ko niiñd aa ga.ī ki bas

vahshat mire mizāj kā hissa na ban sakī

purvā.iyāñ sameT ke kahne lagī ki bas

mujh pe karam to hotā rahā rab kā baar baar

bā-vasf us ke sharm jo aatī rahī ki bas

bil-āḳhir apnī āñkhoñ se jaarī lahū huā

har sānahe pe aañkh yuuñ rotī rahī ki bas

'tāhir' liyā na bhuul ke jiine kā naam bhī

aise basar hamārī huī zindagī ki bas

waqt-e-sahar ek aisi uThi raushni ki bas

jis aankh ne bhi dekha yun chundhiya gai ki bas

ji bhar ke is ke baad kiya raqs maut ne

jage huon ko subh ko nind aa gai ki bas

wahshat mere mizaj ka hissa na ban saki

purwaiyan sameT ke kahne lagi ki bas

mujh pe karam to hota raha rab ka bar bar

ba-wasf us ke sharm jo aati rahi ki bas

bil-aKHir apni aankhon se jari lahu hua

har sanahe pe aankh yun roti rahi ki bas

'tahir' liya na bhul ke jine ka nam bhi

aise basar hamari hui zindagi ki bas