waqt gardish mein ba-andaz-e-digar hai ki jo tha

vaqt gardish meñ ba-andāz-e-digar hai ki jo thā

tan meñ jaañ hai ki jo thī dosh pe sar hai ki jo thā

qāfile luTte ga.e bujhte ga.e dil lekin

ek hañgāma sar-e-rāhguzar hai ki jo thā

tesha-e-fikr vahī nashtar-e-ehsās vahī

zaḳhm-e-sar hai ki jo thā zaḳhm-e-jigar hai ki jo thā

saath qadmoñ ke lagā chaltā hai apnā saaya

vahī ham haiñ vahī sahrā-e-safar hai ki jo thā

aadmī apne ḳhayāloñ kā sulagtā paikar

ḳhud-nigar hai ki jo thā ḳhāk-basar hai ki jo thā

aañkh vāloñ ne to har moḌ pe badle andāz

ek apnā vahī andāz-e-nazar hai ki jo thā

aag jañgal kī bujhā.e ye paḌī hai kis ko

vus.at-e-jāñ meñ vahī raqs-e-sharar hai ki jo thā

aql ye terī hī pūñjī hai samajh yā na samajh

dil ik ujḌā huā jaltā huā ghar hai ki jo thā

pūchhne aa.e haiñ bichhḌe hue lamhe 'hurmat'

kyā vahī silsila-e-shām-o-sahar hai ki jo thā

waqt gardish mein ba-andaz-e-digar hai ki jo tha

tan mein jaan hai ki jo thi dosh pe sar hai ki jo tha

qafile luTte gae bujhte gae dil lekin

ek hangama sar-e-rahguzar hai ki jo tha

tesha-e-fikr wahi nashtar-e-ehsas wahi

zaKHm-e-sar hai ki jo tha zaKHm-e-jigar hai ki jo tha

sath qadmon ke laga chalta hai apna saya

wahi hum hain wahi sahra-e-safar hai ki jo tha

aadmi apne KHayalon ka sulagta paikar

KHud-nigar hai ki jo tha KHak-basar hai ki jo tha

aankh walon ne to har moD pe badle andaz

ek apna wahi andaz-e-nazar hai ki jo tha

aag jangal ki bujhae ye paDi hai kis ko

wusat-e-jaan mein wahi raqs-e-sharar hai ki jo tha

aql ye teri hi punji hai samajh ya na samajh

dil ek ujDa hua jalta hua ghar hai ki jo tha

puchhne aae hain bichhDe hue lamhe 'hurmat'

kya wahi silsila-e-sham-o-sahar hai ki jo tha