waqt guzra hai tere hijr mein aise jaanan

vaqt guzrā hai tire hijr meñ aise jānāñ

koī machhlī binā paanī ke ho jaise jānāñ

ham ko ma.alūm thā tū ḳhush hai bichhaḌ kar ham se

phir bhī ham yaad meñ behad tirī ro.e jānāñ

har guzargāh tirī mujh ko thī manzil kī tarah

tū ne dekhā nahīñ mujh ko kabhī muḌ ke jānāñ

raah kāñToñ bharī gulshan meñ badal saktī thī

ek duuje ko kabhī ham jo samajhte jānāñ

jin pe chalte the zamāne ko bhulā kar ham log

yaad karte haiñ hameñ ab bhī vo raste jānāñ

dil ke goshe meñ thā sandūq tirī yādoñ kā

kar diyā hai use maazī ke havāle jānāñ

ab bhī rah rah ke mire dil meñ chamak uThte haiñ

tū ne dekhe the jo kuchh TūTte taare jānāñ

kuchh to vo zaḳhm haiñ jo tū ne diye haiñ mujh ko

aur kuchh zaḳhm ki logoñ ne uchhāle jānāñ

apne milne ke zamāne meñ haiñ qisse mash.hūr

ham to do pal bhī kabhī saath na baiThe jānāñ

ye ġhazab hai ki ye āsār qayāmat ke haiñ

ek ma.asūm mohabbat pe ye pahre jānāñ

āzmā.ish hai kaḌī terī mohabbat bhī sanam

zulm har rang meñ ham ne tire dekhe jānāñ

terā ye shahr to maskan hai hunar-mandoñ kā

baat badlī huī badle hue chehre jānāñ

murġh-e-bismil kī tarah jaise taḌaptā huuñ maiñ

tū bhī chāhat meñ mirī aise hī taḌpe jānāñ

tere shānoñ pe yūñhī haath rakhā thā maiñ ne

munjamid ho ga.e yādoñ meñ vo lamhe jānāñ

maiñ bhī kuchh vaqt na ruk paayā tumhārī ḳhātir

tum bhī mere liye kuchh der na Thahre jānāñ

tū nigāhoñ meñ basā letī hameñ to ham bhī

ashk ban kar tire gāloñ pe luḌhakte jānāñ

ham ne iqbāl-e-mohabbat pe kahāñ jabr kiyā

baat to baat thī tum baat hī sunte jānāñ

tujh ko Dar hai tujhe mujh se na mohabbat ho jaa.e

mujh ko andesha ise sach na tū samjhe jānāñ

apne milne kī nahīñ aaj bhī koī ummīd

ek muddat huī hālāt na badle jānāñ

waqt guzra hai tere hijr mein aise jaanan

koi machhli bina pani ke ho jaise jaanan

hum ko malum tha tu KHush hai bichhaD kar hum se

phir bhi hum yaad mein behad teri roe jaanan

har guzargah teri mujh ko thi manzil ki tarah

tu ne dekha nahin mujh ko kabhi muD ke jaanan

rah kanTon bhari gulshan mein badal sakti thi

ek duje ko kabhi hum jo samajhte jaanan

jin pe chalte the zamane ko bhula kar hum log

yaad karte hain hamein ab bhi wo raste jaanan

dil ke goshe mein tha sanduq teri yaadon ka

kar diya hai use mazi ke hawale jaanan

ab bhi rah rah ke mere dil mein chamak uThte hain

tu ne dekhe the jo kuchh TuTte tare jaanan

kuchh to wo zaKHm hain jo tu ne diye hain mujh ko

aur kuchh zaKHm ki logon ne uchhaale jaanan

apne milne ke zamane mein hain qisse mashhur

hum to do pal bhi kabhi sath na baiThe jaanan

ye ghazab hai ki ye aasar qayamat ke hain

ek masum mohabbat pe ye pahre jaanan

aazmaish hai kaDi teri mohabbat bhi sanam

zulm har rang mein hum ne tere dekhe jaanan

tera ye shahr to maskan hai hunar-mandon ka

baat badli hui badle hue chehre jaanan

murgh-e-bismil ki tarah jaise taDapta hun main

tu bhi chahat mein meri aise hi taDpe jaanan

tere shanon pe yunhi hath rakha tha main ne

munjamid ho gae yaadon mein wo lamhe jaanan

main bhi kuchh waqt na ruk paya tumhaari KHatir

tum bhi mere liye kuchh der na Thahre jaanan

tu nigahon mein basa leti hamein to hum bhi

ashk ban kar tere galon pe luDhakte jaanan

hum ne iqbaal-e-mohabbat pe kahan jabr kiya

baat to baat thi tum baat hi sunte jaanan

tujh ko Dar hai tujhe mujh se na mohabbat ho jae

mujh ko andesha ise sach na tu samjhe jaanan

apne milne ki nahin aaj bhi koi ummid

ek muddat hui haalat na badle jaanan