waqt hum yun guzar lete hain

vaqt ham yuuñ guzār lete haiñ

jaise muflis udhār lete haiñ

TuuT jaa.e na dil muqābil kā

jiit pā kar bhī haar lete haiñ

apne hisse ke phuul de ke unheñ

un ke hisse kā ḳhaar lete haiñ

kar ke tanhā samāj se ḳhud ko

qarz dil kā utaar lete haiñ

jab na taqsīm ghar kī ho ham se

zalzaloñ ko pukār lete haiñ

un kā va.ada fareb hai phir bhī

jaane kyoñ baar baar lete haiñ

be-qarārī atā huī jin se

ham unhī se qarār lete haiñ

vo bahāreñ luTā rahe haiñ chalo

aks dil meñ utaar lete haiñ

khaal zinda shikār kī aksar

husn vaale utaar lete haiñ

dil ke armāñ na maar de koī

ham unheñ ḳhud hī maar lete haiñ

ham se munkir-nakīr shām-o-sahar

chāhatoñ kā shumār lete haiñ

waqt hum yun guzar lete hain

jaise muflis udhaar lete hain

TuT jae na dil muqabil ka

jit pa kar bhi haar lete hain

apne hisse ke phul de ke unhen

un ke hisse ka KHar lete hain

kar ke tanha samaj se KHud ko

qarz dil ka utar lete hain

jab na taqsim ghar ki ho hum se

zalzalon ko pukar lete hain

un ka wada fareb hai phir bhi

jaane kyon bar bar lete hain

be-qarari ata hui jin se

hum unhi se qarar lete hain

wo bahaaren luTa rahe hain chalo

aks dil mein utar lete hain

khaal zinda shikar ki aksar

husn wale utar lete hain

dil ke arman na mar de koi

hum unhen KHud hi mar lete hain

hum se munkir-nakir sham-o-sahar

chahaton ka shumar lete hain