وقت کا آپ بھی ہر حال میں پیچھا کیجے

وقت کا آپ بھی ہر حال میں پیچھا کیجے

ورنہ بیٹھے ہوئے تقدیر کو کوسا کیجے

آپ الفاظ کے خنجر کو نہ پھینکا کیجے

دل پہ کیا گزرے گی یہ بھی ذرا سوچا کیجے

جب بھی پیچیدہ گزر گاہوں سے گزرا کیجے

کس طرح لوگ بدل جاتے ہیں دیکھا کیجے

اپنی برباد محبت کا نہ چرچا کیجے

خود کو دنیا کی نگاہوں میں نہ رسوا کیجے

اپنے سینے سے اصولوں کو لگائے رکھئے

ہاں زمانے کے تقاضوں کو بھی سمجھا کیجے

زندگی چین سے گزرے گی یقیناً اے ضیاؔ

پہلے جینے کا سلیقہ بھی تو سیکھا کیجے