waqt ka intiKHab hain hum log

vaqt kā intiḳhāb haiñ ham log

bānī-e-inqalāb haiñ ham log

koī ham sā nahīñ zamāne meñ

aap apnā javāb haiñ ham log

tere qadmoñ kī ḳhaak haiñ saaqī

rashk-e-sad-āftāb haiñ ham log

husn meñ aap be-misāl sahī

ishq meñ lā-javāb haiñ ham log

husn vaalo hamārī qadr karo

husn kī āb-o-tāb haiñ ham log

maat khaa.ī hai dil kī baazī meñ

kis qadar kāmyāb haiñ ham log

sar adab se jhukā.iye 'tālib'

ik muqaddas kitāb haiñ ham log

waqt ka intiKHab hain hum log

bani-e-inqalab hain hum log

koi hum sa nahin zamane mein

aap apna jawab hain hum log

tere qadmon ki KHak hain saqi

rashk-e-sad-aftab hain hum log

husn mein aap be-misal sahi

ishq mein la-jawab hain hum log

husn walo hamari qadr karo

husn ki aab-o-tab hain hum log

mat khai hai dil ki bazi mein

kis qadar kaamyab hain hum log

sar adab se jhukaiye 'talib'

ek muqaddas kitab hain hum log