وقت کا ظالم اندھیرا چھا گیا تدبیر پر

وقت کا ظالم اندھیرا چھا گیا تدبیر پر

بس کہاں چلتا ہے کچھ انسان کا تقدیر پر

یاس میں ڈوبی ہیں آنکھیں اور پژمردہ سے لب

آپ دیکھیں گے تو ہنس دیں گے مری تصویر پر

آپ کے مکتوب سے زخموں کے لب پھر کھل گئے

شکریہ صد شکریہ اس شوخیٔ تحریر پر

میں اگر محفل میں اس کی ہو گیا رسوا تو کیا

آپ تو خوش ہو گئے اے دوست اس تحقیر پر

مفلسی دیوانگی آوارگی میرا نصیب

دنگ ہوں لوگو سہانے خواب کی تعبیر پر

میں اگر بد نام ہو جاؤں تو میرا ہے بھلا

کیا ملے گا تم کو میری مفت کی تشہیر پر

دل کی بستی میں ہیں گرچہ آرزوؤں کے کھنڈر

پھر بھی ہوں شہزادؔ نازاں اپنی اس جاگیر پر