waqt ka zalim andhera chha gaya tadbir par

vaqt kā zālim añdherā chhā gayā tadbīr par

bas kahāñ chaltā hai kuchh insān kā taqdīr par

yaas meñ Duubī haiñ āñkheñ aur pazhmurda se lab

aap dekheñge to hañs deñge mirī tasvīr par

aap ke maktūb se zaḳhmoñ ke lab phir khul ga.e

shukriya-sad-shukriya is shoḳhi-e-tahrīr par

maiñ agar mahfil meñ us kī ho gayā rusvā to kyā

aap to ḳhush ho ga.e ai dost is tahqīr par

muflisī dīvāngī āvārgī merā nasīb

dang huuñ logo suhāne ḳhvāb kī ta.abīr par

maiñ agar bad-nām ho jā.ūñ to merā hai bhalā

kyā milegā tum ko merī muft kī tash.hīr par

dil kī bastī meñ haiñ garche ārzūoñ ke khañDar

phir bhī huuñ 'shahzād' nāzāñ apnī is jāgīr par

waqt ka zalim andhera chha gaya tadbir par

bas kahan chalta hai kuchh insan ka taqdir par

yas mein Dubi hain aankhen aur pazhmurda se lab

aap dekhenge to hans denge meri taswir par

aap ke maktub se zaKHmon ke lab phir khul gae

shukriya-sad-shukriya is shoKHi-e-tahrir par

main agar mahfil mein us ki ho gaya ruswa to kya

aap to KHush ho gae ai dost is tahqir par

muflisi diwangi aawargi mera nasib

dang hun logo suhane KHwab ki tabir par

main agar bad-nam ho jaun to mera hai bhala

kya milega tum ko meri muft ki tashhir par

dil ki basti mein hain garche aarzuon ke khanDar

phir bhi hun 'shahzad' nazan apni is jagir par