waqt ke hathon mujhe majbur hona tha hua

vaqt ke hāthoñ mujhe majbūr honā thā huā

rishta-e-mehr-o-vafā kāfūr honā thā huā

tilmilā kar ro paḌī hai koshish-e-chāra-garī

mere dil ke zaḳhm ko nāsūr honā thā huā

tum rahe qaidī makāñ ke yā the ḳhvāb-e-nāz meñ

mujh ko din bhar kī thakan se chuur honā thā huā

kho ga.e rāhoñ meñ kitne hī yahāñ ahl-e-ḳhirad

daar par chaḌh kar jise mash.hūr honā thā huā

us but-e-tannāz kī āñkhoñ pe tohmat kyā lage

mere dil ke aa.ine ko chuur honā thā huā

ham to ai 'mushtāq' mast-e-sāqi-e-mahfil rahe

jis ko said-e-duḳhtar-e-añgūr honā thā huā

waqt ke hathon mujhe majbur hona tha hua

rishta-e-mehr-o-wafa kafur hona tha hua

tilmila kar ro paDi hai koshish-e-chaara-gari

mere dil ke zaKHm ko nasur hona tha hua

tum rahe qaidi makan ke ya the KHwab-e-naz mein

mujh ko din bhar ki thakan se chur hona tha hua

kho gae rahon mein kitne hi yahan ahl-e-KHirad

dar par chaDh kar jise mashhur hona tha hua

us but-e-tannaz ki aankhon pe tohmat kya lage

mere dil ke aaine ko chur hona tha hua

hum to ai 'mushtaq' mast-e-saqi-e-mahfil rahe

jis ko said-e-duKHtar-e-angur hona tha hua