waqt ke KHudaon mein kaisi hoshiyari hai

vaqt ke ḳhudāoñ meñ kaisī hoshiyārī hai

bhes haiñ amīroñ ke zehniyat bhikārī hai

ḳhud-baḳhud nahīñ haa.el nafratoñ kī dīvāreñ

kuchh ḳhatā tumhārī thī kuchh ḳhatā hamārī hai

laakh maiñ shahādat duuñ koī kyoñ ye mānegā

shams ne mire ghar meñ tīrgī utārī hai

kar liyā sabhī ne tai mujh ko to rulāne kā

ik hañsī pe merī to sab ko be-qarārī hai

qahqahe hoñ aañsū hoñ chāhe sukh hoñ yā dukh hoñ

merī jhoñpaḌī mujh ko har tarah se pyārī hai

dushmanoñ kī mahfil meñ le chalā mujhe ye dil

mujh pe ai ḳhudā kaisī bebasī ye taarī hai

ik zarā sā ġham 'nashtar' kyoñ bhalā na raas aayā

phuul ne to kāñToñ meñ zindagī guzārī hai

waqt ke KHudaon mein kaisi hoshiyari hai

bhes hain amiron ke zehniyat bhikari hai

KHud-baKHud nahin hael nafraton ki diwaren

kuchh KHata tumhaari thi kuchh KHata hamari hai

lakh main shahadat dun koi kyon ye manega

shams ne mere ghar mein tirgi utari hai

kar liya sabhi ne tai mujh ko to rulane ka

ek hansi pe meri to sab ko be-qarari hai

qahqahe hon aansu hon chahe sukh hon ya dukh hon

meri jhonpaDi mujh ko har tarah se pyari hai

dushmanon ki mahfil mein le chala mujhe ye dil

mujh pe ai KHuda kaisi bebasi ye tari hai

ek zara sa gham 'nashtar' kyon bhala na ras aaya

phul ne to kanTon mein zindagi guzari hai