وقت کی آگ سے شعلوں سے شرر سے ہو کر

وقت کی آگ سے شعلوں سے شرر سے ہو کر

بارہا گزرا ہوں اس راہ گزر سے ہو کر

راہ دل اس لیے پامال نظر آتی ہے

نت نئی خواہشیں جاتی ہیں ادھر سے ہو کر

اسی باعث نہیں ہوتا ہے تعجب ان پہ

حادثے گزرے ہیں سب میری نظر سے ہو کر

اتنا معلوم رہے شورش ہستی تجھ کو

کشتیٔ زیست بھی نکلی ہے بھنور سے ہو کر

جو ابھی تک مرے ہونٹوں پہ نہیں آئی تھی

وہ دعا لوٹ بھی آئی ترے در سے ہو کر

اپنے آپے میں نہیں آیا ہے پہروں راحتؔ

جب بھی دل لوٹا ہے امید نگر سے ہو کر