waqt ki barf hai har taur pighalne wali

vaqt kī barf hai har taur pighalne vaalī

din bhī hai zer-e-safar shaam bhī Dhalne vaalī

ishq saa.e kī tarah saath chipak jaatā hai

ye balā to na kisī taur hai Talne vaalī

ham vo pahiye jo agar saath barābar na chale

ek meter bhī ye gaaḌī nahīñ chalne vaalī

ek dhaḌkā hai mire dil ko ḳhabardārī kā

ek ḳhvāhish hai mire zehn meñ palne vaalī

zard kah kar nazar-andāz kiyā thā jis ko

ab vahī shāḳh huī phūlne-phalne vaalī

hai ajab vaqt kī holī ki har ik chakkar par

suuī chehre pe nayā rañg hai malne vaalī

dā.era toḌā to hairat hī dar aa.ī 'zīshān'

ab ye hairat nahīñ andar se nikalne vaalī

waqt ki barf hai har taur pighalne wali

din bhi hai zer-e-safar sham bhi Dhalne wali

ishq sae ki tarah sath chipak jata hai

ye bala to na kisi taur hai Talne wali

hum wo pahiye jo agar sath barabar na chale

ek meter bhi ye gaDi nahin chalne wali

ek dhaDka hai mere dil ko KHabardari ka

ek KHwahish hai mere zehn mein palne wali

zard kah kar nazar-andaz kiya tha jis ko

ab wahi shaKH hui phulne-phalne wali

hai ajab waqt ki holi ki har ek chakkar par

sui chehre pe naya rang hai malne wali

daera toDa to hairat hi dar aai 'zishan'

ab ye hairat nahin andar se nikalne wali