waqt ne sab tahrir kiya mere KHadd-o-Khaal pe kya guzri

vaqt ne sab tahrīr kiyā mire ḳhadd-o-ḳhāl pe kyā guzrī

tere baa'd jo saath chale the un mah-o-sāl pe kyā guzrī

dast-e-karam ne daad to paa.ī dād-o-dahish kī mahfil meñ

dast-e-karam ne ye nahīñ sochā dast-e-savāl pe kyā guzrī

ḳhuun hai lafzoñ āvāzoñ meñ ḳhāmoshī meñ lāsheñ haiñ

maslahatoñ ke ahd meñ dekho shahr-e-ḳhayāl pe kyā guzrī

nūr-e-sahar meñ nahāne vaale shab-āsūda kyoñ socheñ

jis kā lahū thā raunaq-e-shab us sham-e-jamāl pe kyā guzrī

sab kī nigāheñ tum par haiñ kyā pūchhe koī aise meñ

tum ko dekh ke jo gum-sum hai us behāl pe kyā guzrī

'qaisī' sāhab bastī-bastī khoTe sikkoñ kā hai chalan

ye mat pūchho ahl-e-hunar ke husn-e-kamāl pe kyā guzrī

waqt ne sab tahrir kiya mere KHadd-o-KHal pe kya guzri

tere ba'd jo sath chale the un mah-o-sal pe kya guzri

dast-e-karam ne dad to pai dad-o-dahish ki mahfil mein

dast-e-karam ne ye nahin socha dast-e-sawal pe kya guzri

KHun hai lafzon aawazon mein KHamoshi mein lashen hain

maslahaton ke ahd mein dekho shahr-e-KHayal pe kya guzri

nur-e-sahar mein nahane wale shab-asuda kyon sochen

jis ka lahu tha raunaq-e-shab us sham-e-jamal pe kya guzri

sab ki nigahen tum par hain kya puchhe koi aise mein

tum ko dekh ke jo gum-sum hai us behaal pe kya guzri

'qaisi' sahab basti-basti khoTe sikkon ka hai chalan

ye mat puchho ahl-e-hunar ke husn-e-kamal pe kya guzri