waqt se pahle hui sham gila kis se karun

vaqt se pahle huī shaam gila kis se karūñ

rah ga.e kitne mire kaam gila kis se karūñ

apnī nākām tamannā kā sabab maiñ to na thī

aa gayā mujh pe hī ilzām gila kis se karūñ

dil hirāsāñ hai bahut dekh ke anjām-e-vafā

ai mirī hasrat-e-nākām gila kis se karūñ

ab to vo mujh se milātā hī nahīñ apnī nazar

ab chhalakte hī nahīñ jaam gila kis se karūñ

mere qadmoñ ne mirā saath kahāñ chhoḌ diyā

manzil-e-shauq thī do-gām gila kis se karūñ

hijr kā rog bhī rusvā.ī bhī paa.ī 'rūmī'

pūchh mat ishq kā anjām gila kis se karūñ

waqt se pahle hui sham gila kis se karun

rah gae kitne mere kaam gila kis se karun

apni nakaam tamanna ka sabab main to na thi

aa gaya mujh pe hi ilzam gila kis se karun

dil hirasan hai bahut dekh ke anjam-e-wafa

ai meri hasrat-e-nakaam gila kis se karun

ab to wo mujh se milata hi nahin apni nazar

ab chhalakte hi nahin jam gila kis se karun

mere qadmon ne mera sath kahan chhoD diya

manzil-e-shauq thi do-gam gila kis se karun

hijr ka rog bhi ruswai bhi pai 'rumi'

puchh mat ishq ka anjam gila kis se karun