وقت اڑنے کا ہے گروی بال و پر کیوں کر رکھیں

وقت اڑنے کا ہے گروی بال و پر کیوں کر رکھیں

ہم ہیں فطرت سے مسافر کوئی گھر کیونکر رکھیں

جب ضرورت تھی کسی شانے کی ہم کو نہ ملا

اب ملا تو سوچتے ہیں اس پہ سر کیوں کر رکھیں

وقت خود اک راہزن ہے زندگی کی راہ میں

پاس اپنے عشق سا لعل و گہر کیوں کر رکھیں

جب تلک ہے سانس ہم کو زخم کھانے اور ہیں

ایک غم کی یاد میں پھر چشم تر کیوں کر رکھیں

تجھ کو پا لیں یا کہ کھو دیں ہے زیاں دونوں طرح

پھر بھلا اے جان جاں تیری خبر کیوں کر رکھیں