waraq waraq pe fasana bikharne wala tha

varaq varaq pe fasāna bikharne vaalā thā

bachā liyā mujhe us ne maiñ marne vaalā thā

shagufta phuul pareshāñ huā to ġham na karo

ki vo to yuuñ bhī havā meñ bikharne vaalā thā

maiñ us ko dekh ke phir kuchh na dekh pā.ūñgā

ye hādisa bhī mujhī par guzarne vaalā thā

pahāḌ sīna-sipar ho gayā thā mere liye

vagarna mujh meñ samundar utarne vaalā thā

maiñ be-qusūr huuñ ye faisla huā varna

maiñ apne jurm kā iqrār karne vaalā thā

umaD paḌā thā jo sailāb-e-hijr-e-tanhā.ī

vo shahr-e-dil ko bhī ġharqāb karne vaalā thā

waraq waraq pe fasana bikharne wala tha

bacha liya mujhe us ne main marne wala tha

shagufta phul pareshan hua to gham na karo

ki wo to yun bhi hawa mein bikharne wala tha

main us ko dekh ke phir kuchh na dekh paunga

ye hadisa bhi mujhi par guzarne wala tha

pahaD sina-sipar ho gaya tha mere liye

wagarna mujh mein samundar utarne wala tha

main be-qusur hun ye faisla hua warna

main apne jurm ka iqrar karne wala tha

umaD paDa tha jo sailab-e-hijr-e-tanhai

wo shahr-e-dil ko bhi gharqab karne wala tha