ورق ورق پہ فسانہ بکھرنے والا تھا

ورق ورق پہ فسانہ بکھرنے والا تھا

بچا لیا مجھے اس نے میں مرنے والا تھا

شگفتہ پھول پریشاں ہوا تو غم نہ کرو

کہ وہ تو یوں بھی ہوا میں بکھرنے والا تھا

میں اس کو دیکھ کے پھر کچھ نہ دیکھ پاؤں گا

یہ حادثہ بھی مجھی پر گزرنے والا تھا

پہاڑ سینہ سپر ہو گیا تھا میرے لئے

وگرنہ مجھ میں سمندر اترنے والا تھا

میں بے قصور ہوں یہ فیصلہ ہوا ورنہ

میں اپنے جرم کا اقرار کرنے والا تھا

امڈ پڑا تھا جو سیلاب ہجر تنہائی

وہ شہر دل کو بھی غرقاب کرنے والا تھا