waraq waraq tujhe tahrir karta rahta hun

varaq varaq tujhe tahrīr kartā rahtā huuñ

maiñ zindagī tirī tash.hīr kartā rahtā huuñ

bahut aziiz hai mujh ko masāfatoñ kī thakan

safar ko paañv kī zanjīr kartā rahtā huuñ

musavviroñ ko hai zom-e-musavvirī lekin

maiñ apnī ziist ko tasvīr kartā rahtā huuñ

maiñ sauñp detā huuñ har raat apne ḳhvāboñ ko

har ek sub.h ko tābīr kartā rahtā huuñ

sipar banātā huuñ lafzoñ ko sher meñ lekin

qalam ko apne maiñ shamshīr kartā rahtā huuñ

hazār aib ḳhud apne hī naam meñ likh kar

maiñ terī raa.e hama-gīr kartā rahtā huuñ

vo merī fikr meñ badle kā zahr gholtā hai

magar maiñ zahr ko iksīr kartā rahtā huuñ

maiñ shahr shahr bhaTaktā huuñ aur rozāna

ḳhud apnī zaat kī tāmīr kartā rahtā huuñ

likhe haiñ hisse meñ mere 'ra.īs' sannāTe

navā-e-vaqt kī tasḳhīr kartā rahtā huuñ

waraq waraq tujhe tahrir karta rahta hun

main zindagi teri tashhir karta rahta hun

bahut aziz hai mujh ko masafaton ki thakan

safar ko panw ki zanjir karta rahta hun

musawwiron ko hai zom-e-musawwiri lekin

main apni zist ko taswir karta rahta hun

main saunp deta hun har raat apne KHwabon ko

har ek subh ko tabir karta rahta hun

sipar banata hun lafzon ko sher mein lekin

qalam ko apne main shamshir karta rahta hun

hazar aib KHud apne hi nam mein likh kar

main teri rae hama-gir karta rahta hun

wo meri fikr mein badle ka zahr gholta hai

magar main zahr ko iksir karta rahta hun

main shahr shahr bhaTakta hun aur rozana

KHud apni zat ki tamir karta rahta hun

likhe hain hisse mein mere 'rais' sannaTe

nawa-e-waqt ki tasKHir karta rahta hun