wasl banne ka kuchh banaw nahin

vasl banñe kā kuchh banāv nahīñ

vaañ lagā dil jahāñ lagāv nahīñ

paañv kyuuñ dābne nahīñ dete

gar kisī kā tumheñ dabāv nahīñ

zaḳhm-e-dil kā ilaaj kyā kiije

qābil-e-marham apnā ghaav nahīñ

aise dariyā meñ bah chale haiñ ki aah!

jis meñ Taapu nahīñ hai naav nahīñ

hai bahut jalva-gāh-e-yār buland

dekheñ kyā yaañ se kuchh dikhāv nahīñ

bal be terī sajāvaT.eñ allāh

kuchh qayāmat hai ye banāv nahīñ

dastaras vaañ zarā nahīñ aur haa.e

dil meñ kyā kyā hamāre chaav nahīñ

le ke dil yuuñ kahe hai chitvan meñ

ab mirī bazm meñ tum aao nahīñ

dard-e-pinhāñ se jī hī nikle hai

kyā kaheñ tum se kuchh chhupāv nahīñ

gar safar ko sidhāre ho to aao

jā ke vaañ chhāvnī tū chhāv nahīñ

kyūñki 'jur.at' lagā.eñ ham laggā

ki farishte kā vaañ lagāv nahīñ

aur to aur chorī chorī se

baat kar lene kā bhī daav nahīñ

wasl banne ka kuchh banaw nahin

wan laga dil jahan lagaw nahin

panw kyun dabne nahin dete

gar kisi ka tumhein dabaw nahin

zaKHm-e-dil ka ilaj kya kije

qabil-e-marham apna ghaw nahin

aise dariya mein bah chale hain ki aah!

jis mein Tapu nahin hai naw nahin

hai bahut jalwa-gah-e-yar buland

dekhen kya yan se kuchh dikhaw nahin

bal be teri sajawaTen allah

kuchh qayamat hai ye banaw nahin

dastaras wan zara nahin aur hae

dil mein kya kya hamare chaw nahin

le ke dil yun kahe hai chitwan mein

ab meri bazm mein tum aao nahin

dard-e-pinhan se ji hi nikle hai

kya kahen tum se kuchh chhupaw nahin

gar safar ko sidhaare ho to aao

ja ke wan chhawni tu chhaw nahin

kyunki 'jurat' lagaen hum lagga

ki farishte ka wan lagaw nahin

aur to aur chori chori se

baat kar lene ka bhi daw nahin