wasl ki rut ho ki furqat ki faza mujhse hai

vasl kī rut ho ki furqat kī fazā mujh se hai

ishq kī raah meñ sab achchhā burā mujh se hai

ye haqīqat hai ki tujh se hai mirā honā magar

bandagī merī hai so tū bhī ḳhudā mujh se hai

tū to bas chhoḌ gayā thā mere siine meñ ise

terī furqat kā magar zaḳhm harā mujh se hai

mere hī hone se taarī hai divānoñ pe junūñ

tere nazdīk bhī ye raqs-e-havā mujh se hai

varna ek tajraba-e-dīd hī kaafī hotā

merī hī aañkh magar ḳhaufzada mujh se hai

maiñ ne baḳhshā hai tujhe ye gul-e-tāza kā shabāb

ye na.ī ḳhushbueñ ye rañg nayā mujh se hai

mujh se hāsil thā tere jism ke dhāge ko kapās

kis tarah sochtā hai tū ki judā mujh se hai

wasl ki rut ho ki furqat ki faza mujh se hai

ishq ki rah mein sab achchha bura mujh se hai

ye haqiqat hai ki tujh se hai mera hona magar

bandagi meri hai so tu bhi KHuda mujh se hai

tu to bas chhoD gaya tha mere sine mein ise

teri furqat ka magar zaKHm hara mujh se hai

mere hi hone se tari hai diwanon pe junun

tere nazdik bhi ye raqs-e-hawa mujh se hai

warna ek tajraba-e-did hi kafi hota

meri hi aankh magar KHaufzada mujh se hai

main ne baKHsha hai tujhe ye gul-e-taza ka shabab

ye nai KHushbuen ye rang naya mujh se hai

mujh se hasil tha tere jism ke dhage ko kapas

kis tarah sochta hai tu ki juda mujh se hai