wasl ki shab bhi KHafa wo but-e-maghrur raha

vasl kī shab bhī ḳhafā vo but-e-maġhrūr rahā

hausla dil kā jo thā dil meñ ba-dastūr rahā

umr-e-rafta ke talaf hone kā aayā to ḳhayāl

lekin ik dam kī talāfī kā na maqdūr rahā

jam.a kis din na hue mausam-e-gul meñ mai-kash

roz hañgāma tah-e-sāya-e-angūr rahā

gardish-e-baḳht kahāñ se hameñ laa.ī hai kahāñ

manziloñ vādī-e-ġhurbat se vatan duur rahā

rāst-bāzī kar agar nāmvarī hai darkār

daar se ḳhalq meñ āvāz-e-mansūr rahā

vo to hai charḳh chahārum pe ye pach mohalle par

sach hai iisā se bhī baalā tirā mazdūr rahā

fasl-e-gul aa.ī ga.ī sehn-e-chaman meñ sau baar

apne sar meñ thā jo saudā vo ba-dastūr rahā

jalva-e-barq-e-tajallī nazar aayā na kabhī

muddatoñ jā ke vahāñ meñ shajar-e-tūr rahā

zulf o ruḳh donoñ haiñ jaane se javānī ke ḳharāb

mushk vo mushk na kāfūr vo kāfūr rahā

ġhol-e-sahrā ne mirā saath na chhoḌā shab bhar

le ke mash.al kabhī nazdīk kabhī duur rahā

ham bhī maujūd the kal mahfil-e-jānāñ meñ 'amīr'

raat ko der talak aap kā mazkūr rahā

wasl ki shab bhi KHafa wo but-e-maghrur raha

hausla dil ka jo tha dil mein ba-dastur raha

umr-e-rafta ke talaf hone ka aaya to KHayal

lekin ek dam ki talafi ka na maqdur raha

jama kis din na hue mausam-e-gul mein mai-kash

roz hangama tah-e-saya-e-angur raha

gardish-e-baKHt kahan se hamein lai hai kahan

manzilon wadi-e-ghurbat se watan dur raha

rast-bazi kar agar namwari hai darkar

dar se KHalq mein aawaz-e-mansur raha

wo to hai charKH chahaarum pe ye pach mohalle par

sach hai isa se bhi baala tera mazdur raha

fasl-e-gul aai gai sehn-e-chaman mein sau bar

apne sar mein tha jo sauda wo ba-dastur raha

jalwa-e-barq-e-tajalli nazar aaya na kabhi

muddaton ja ke wahan mein shajar-e-tur raha

zulf o ruKH donon hain jaane se jawani ke KHarab

mushk wo mushk na kafur wo kafur raha

ghol-e-sahra ne mera sath na chhoDa shab bhar

le ke mashal kabhi nazdik kabhi dur raha

hum bhi maujud the kal mahfil-e-jaanan mein 'amir'

raat ko der talak aap ka mazkur raha