wasl ki zid se uThen hijr ko roya na karen

vasl kī zid se uTheñ hijr ko royā na kareñ

besh-qīmat haiñ ye lamhe inheñ khoyā na kareñ

nāsehā aur batā ham ko ki kyā kyā na kareñ

din meñ soyā na kareñ raat ko jaagā na kareñ

manzil-e-zikr ruḳh-e-yār se aage kuchh ho

ham se to ho nahīñ saktā ise sochā na kareñ

ham ko rahnā hai isī qarya-e-kam-nazrāñ meñ

saḳht mushkil hai yahāñ rah ke dikhāvā na kareñ

jhuuT sau baar kahā jaa.e to sach lagtā hai

mashvara ye hai ki ḳhud par bhī bharosa na kareñ

yaar kahte haiñ ki ye taur-e-junūñ achchhā nahīñ

us kī tasvīr ko āñkhoñ se lagāyā na kareñ

ham nahīñ kar sake logoñ kī nazar ko qaabū

laḌkiyoñ se kaho bārish meñ yuuñ bhīgā na kareñ

ab jidhar dekhiye ik mahshar-e-ḳhūbī hai bapā

aarzū kis kī kareñ kis kī tamannā na kareñ

kaif haiñ aap koī majnūñ-o-farhād nahīñ

pā-barahna nigah-e-ḳhalq meñ aayā na kareñ

wasl ki zid se uThen hijr ko roya na karen

besh-qimat hain ye lamhe inhen khoya na karen

naseha aur bata hum ko ki kya kya na karen

din mein soya na karen raat ko jaga na karen

manzil-e-zikr ruKH-e-yar se aage kuchh ho

hum se to ho nahin sakta ise socha na karen

hum ko rahna hai isi qarya-e-kam-nazran mein

saKHt mushkil hai yahan rah ke dikhawa na karen

jhuT sau bar kaha jae to sach lagta hai

mashwara ye hai ki KHud par bhi bharosa na karen

yar kahte hain ki ye taur-e-junun achchha nahin

us ki taswir ko aankhon se lagaya na karen

hum nahin kar sake logon ki nazar ko qabu

laDkiyon se kaho barish mein yun bhiga na karen

ab jidhar dekhiye ek mahshar-e-KHubi hai bapa

aarzu kis ki karen kis ki tamanna na karen

kaif hain aap koi majnun-o-farhad nahin

pa-barahna nigah-e-KHalq mein aaya na karen