watan jis roz se chhuTa hai wo manzar nahin milta

vatan jis roz se chhūTā hai vo manzar nahīñ miltā

dar-o-dīvār mil jaate haiñ lekin ghar nahīñ miltā

bahut mushkil hai do duniyāoñ meñ ik shaḳhs kā rahnā

jo mujh meñ sochtā hai vo mujhe bāhar nahīñ miltā

na sīkhe baap kī uñglī pakaḌ kar tifl gar chalnā

use manzil to mil jaa.e magar rahbar nahīñ miltā

munāfe.a-ḳhor do din ke liye bhī kar nahīñ sakte

sile meñ jis amal ke naqd-e-māl-o-zar nahīñ miltā

nikāle kaam apnā ḳhauf kī vo parvarish karke

mire dushman ko mujh meñ koī aisā Dar nahīñ miltā

jabīnoñ meñ taḌapte haiñ jo sajde vo kahāñ jaa.eñ

dayār-e-ġhair meñ jab terā sañg-e-dar nahīñ miltā

mirā sajda hai zarb-e-but-shikan pindār ke sar par

yahāñ is raaz se vāqif koī ham-sar nahīñ miltā

zarūrat ke mutābiq sab ko ai 'muḳhtār' miltā hai

gila is baat kā rahtā hai jholī bhar nahīñ miltā

watan jis roz se chhuTa hai wo manzar nahin milta

dar-o-diwar mil jate hain lekin ghar nahin milta

bahut mushkil hai do duniyaon mein ek shaKHs ka rahna

jo mujh mein sochta hai wo mujhe bahar nahin milta

na sikhe bap ki ungli pakaD kar tifl gar chalna

use manzil to mil jae magar rahbar nahin milta

munafea-KHor do din ke liye bhi kar nahin sakte

sile mein jis amal ke naqd-e-mal-o-zar nahin milta

nikale kaam apna KHauf ki wo parwarish karke

mere dushman ko mujh mein koi aisa Dar nahin milta

jabinon mein taDapte hain jo sajde wo kahan jaen

dayar-e-ghair mein jab tera sang-e-dar nahin milta

mera sajda hai zarb-e-but-shikan pindar ke sar par

yahan is raaz se waqif koi ham-sar nahin milta

zarurat ke mutabiq sab ko ai 'muKHtar' milta hai

gila is baat ka rahta hai jholi bhar nahin milta