watan ke jaan-nisaron ko milengi beDiyan kab tak

vatan ke jāñ-nisāroñ ko mileñgī beḌiyāñ kab tak

liyā jā.egā āḳhir-kār ham se imtihāñ kab tak

uThā kartā rahegā yuuñ nasheman se dhuāñ kab tak

hamāre āshiyānoñ par gireñgī bijliyāñ kab tak

zamīr ahl-e-siyāsat kā bhalā kis roz jāgegā

jalegā nafratoñ kī aag meñ hindostāñ kab tak

na samjhāo hameñ manshūr apne bas ye batlā do

hameñ bhar peT mil pā.eñgī āḳhir roTiyāñ kab tak

asar kab tak kareñgī zahr meñ Duubī ye taqrīreñ

diloñ meñ aap rakheñge hamāre dūriyāñ kab tak

bhalā kis roz TūTeñgī rivāyat kī ye zanjīreñ

jahezoñ ke liye jaltī raheñgī beTiyāñ kab tak

jahāñ hañgāma barpā ho vahāñ hai kufr ḳhāmoshī

ai 'tashna' tum bhī kuchh bolo rahoge be-zabāñ kab tak

watan ke jaan-nisaron ko milengi beDiyan kab tak

liya jaega aaKHir-kar hum se imtihan kab tak

uTha karta rahega yun nasheman se dhuan kab tak

hamare aashiyanon par girengi bijliyan kab tak

zamir ahl-e-siyasat ka bhala kis roz jagega

jalega nafraton ki aag mein hindostan kab tak

na samjhao hamein manshur apne bas ye batla do

hamein bhar peT mil paengi aaKHir roTiyan kab tak

asar kab tak karengi zahr mein Dubi ye taqriren

dilon mein aap rakhenge hamare duriyan kab tak

bhala kis roz TuTengi riwayat ki ye zanjiren

jahezon ke liye jalti rahengi beTiyan kab tak

jahan hangama barpa ho wahan hai kufr KHamoshi

ai 'tashna' tum bhi kuchh bolo rahoge be-zaban kab tak