widaa-e-sham bhi tanwir ho rahi thi kahin

vidā.a-e-shām bhī tanvīr ho rahī thī kahīñ

so apnī ḳhaak bhī iksīr ho rahī thī kahīñ

koī ki niiñd se bedār ho rahā thā kahīñ

kisī ke ḳhvāb kī ta.abīr ho rahī thī kahīñ

kahīñ pe jaldī se taḳhlīq ho rahā thā jahāñ

kahīñ pe sūrat-e-tāḳhīr ho rahī thī kahīñ

fanā baqā pe kahīñ rakh rahe the log use

aur us ke husn kī tafsīr ho rahī thī kahīñ

yahāñ pe nīm-shabī ne paḌāv Daal liyā

vahāñ pe sub.h ki taqdīr ho rahī thī kahīñ

hamāre hone se 'iqrār' muddatoñ pahle

hamāre hone kī tadbīr ho rahī thī kahīñ

widaa-e-sham bhi tanwir ho rahi thi kahin

so apni KHak bhi iksir ho rahi thi kahin

koi ki nind se bedar ho raha tha kahin

kisi ke KHwab ki tabir ho rahi thi kahin

kahin pe jaldi se taKHliq ho raha tha jahan

kahin pe surat-e-taKHir ho rahi thi kahin

fana baqa pe kahin rakh rahe the log use

aur us ke husn ki tafsir ho rahi thi kahin

yahan pe nim-shabi ne paDaw Dal liya

wahan pe subh ki taqdir ho rahi thi kahin

hamare hone se 'iqrar' muddaton pahle

hamare hone ki tadbir ho rahi thi kahin