ویران دل میں رونق کاشانہ بن کے آ
اے یاد یار جلوۂ جانانہ بن کے آ
حاصل ہوں تلخیوں میں بھی لذات اے حیات
بزم جہاں میں گردش پیمانہ بن کے آ
دونوں کی ظلمتوں کو ضرورت ہے نور کی
شمع حرم چراغ صنم خانہ بن کے آ
شمع جمال یار فروزاں ہے بزم میں
دیدار کی ہوس ہے تو پروانہ بن کے آ
اپنوں کی قدر ہوتی نہیں اس دیار میں
ہر چند آشنا ہے پہ بیگانہ بن کے آ
چشم جہاں کو نور حقیقت کی کب ہے تاب
مرغوب طبع جو ہو وہ افسانہ بن کے آ
جا بزم اہل حال میں دیوانگی لیے
اور بزم اہل قال میں فرزانہ بن کے آ
رخ دوسرا بھی اپنا جہاں کو دکھا ہی دے
اے شان فقر سطوت شاہانہ بن کے آ
ہنگامۂ جہاں سے بہت تھک چکے ہیں اب
اے زندگی خموشیٔ ویرانہ بن کے آ
گر ہے متاع غم کا خریدار اے ولیؔ
بازار درد میں زر بیعانہ بن کے آ
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
