viran dil mein raunaq-e-kashana ban ke aa

vīrān dil meñ raunaq-e-kāshāna ban ke aa

ai yād-e-yār jalva-e-jānāna ban ke aa

hāsil hoñ talḳhiyoñ meñ bhī lazzāt ai hayāt

bazm-e-jahāñ meñ gardish-e-paimāna ban ke aa

donoñ kī zulmatoñ ko zarūrat hai nuur kī

sham-e-haram charāġh-e-sanam-ḳhāna ban ke aa

sham.a-e-jamāl-e-yār farozāñ hai bazm meñ

dīdār kī havas hai to parvāna ban ke aa

apnoñ kī qadr hotī nahīñ is dayār meñ

har chand āshnā hai pe begāna ban ke aa

chashm-e-jahāñ ko nūr-e-haqīqat kī kab hai taab

marġhūb-e-tab.a jo ho vo afsāna ban ke aa

jā bazm-e-ahl-e-hāl meñ dīvāngī liye

aur bazm-e-ahl-e-qāl meñ farzāna ban ke aa

ruḳh dūsrā bhī apnā jahāñ ko dikhā hī de

ai shān-e-faqr satvat-e-shāhāna ban ke aa

hangāma-e-jahāñ se bahut thak chuke haiñ ab

ai zindagī ḳhamoshī-e-vīrāna ban ke aa

gar hai matā-e-ġham kā ḳharīdār ai 'valī'

bāzār-e-dard meñ zar-e-bai.āna ban ke aa

viran dil mein raunaq-e-kashana ban ke aa

ai yaad-e-yar jalwa-e-jaanana ban ke aa

hasil hon talKHiyon mein bhi lazzat ai hayat

bazm-e-jahan mein gardish-e-paimana ban ke aa

donon ki zulmaton ko zarurat hai nur ki

sham-e-haram charagh-e-sanam-KHana ban ke aa

shama-e-jamal-e-yar farozan hai bazm mein

didar ki hawas hai to parwana ban ke aa

apnon ki qadr hoti nahin is dayar mein

har chand aashna hai pe begana ban ke aa

chashm-e-jahan ko nur-e-haqiqat ki kab hai tab

marghub-e-taba jo ho wo afsana ban ke aa

ja bazm-e-ahl-e-haal mein diwangi liye

aur bazm-e-ahl-e-qal mein farzana ban ke aa

ruKH dusra bhi apna jahan ko dikha hi de

ai shan-e-faqr satwat-e-shahana ban ke aa

hangama-e-jahan se bahut thak chuke hain ab

ai zindagi KHamoshi-e-virana ban ke aa

gar hai mata-e-gham ka KHaridar ai 'wali'

bazar-e-dard mein zar-e-baiana ban ke aa