ویران جزیروں کا سفر ختم نہ ہو جائے

ویران جزیروں کا سفر ختم نہ ہو جائے

یہ سلسلۂ فکر و نظر ختم نہ ہو جائے

اے ہم نفسو اور قریب اور قریب آؤ

یہ محفل فردوس نظر ختم نہ ہو جائے

گھر میں بھی نظر آئیں گے انداز بیاباں

جب تک مری وحشت کا اثر ختم نہ ہو جائے

توقیر محبت پہ کہیں حرف نہ آ جائے

اے چارہ گرو درد جگر ختم نہ ہو جائے

اس شہر کی جانب بڑھو اے قافلے والو

گنجائش ارباب ہنر ختم نہ ہو جائے

ہوتی رہی آنکھوں سے جو یوں خون کی بارش

دل ختم نہ ہو جائے جگر ختم نہ ہو جائے

بسملؔ کو نہ اس طرح نگاہوں سے گراؤ

دریائے محبت کا گہر ختم نہ ہو جائے