visal-o-hijr ke janjal mein paDa hua hun

visāl-o-hijr ke janjāl meñ paḌā huā huuñ

meñ arsh-e-rau kahāñ pātāl meñ paḌā huā huuñ

vahī ghuTan, vahī ma.amūl zindagī, vahī ġham

kahāñ maiñ jashn na.e saal meñ paḌā huā huuñ

yahāñ se niklūñ kisī aur kā shikār banūñ

isī liye to tire jaal meñ paḌā huā huuñ

garebāñ chāk, dhuāñ, jaam, haath meñ cigarette

shab-e-firāq, ajab haal meñ paḌā huā huuñ

pahuñch chukā hai zamāna zamīñ se chāñd tilak

kahāñ maiñ zulf, nazar, gaal meñ paḌā huā huuñ

visal-o-hijr ke janjal mein paDa hua hun

mein arsh-e-rau kahan patal mein paDa hua hun

wahi ghuTan, wahi mamul zindagi, wahi gham

kahan main jashn nae sal mein paDa hua hun

yahan se niklun kisi aur ka shikar banun

isi liye to tere jal mein paDa hua hun

gareban chaak, dhuan, jam, hath mein cigarette

shab-e-firaq, ajab haal mein paDa hua hun

pahunch chuka hai zamana zamin se chand tilak

kahan main zulf, nazar, gal mein paDa hua hun