وہ آدمی مجھے پریوں کی داستاں کا لگا

وہ آدمی مجھے پریوں کی داستاں کا لگا

حسیں تھا اتنا کسی اور ہی جہاں کا لگا

وہ خد و خال تھے پورب کے یا کہ پچھم کے

جب اس کو غور سے دیکھا کہاں کہاں کا لگا

ہزار وسوسے لاحق تھے جس کے ملنے پر

جب اس کے دل کو ٹٹولا تو مہرباں کا لگا

ملا جب اس سے تو تھا اتنی بد حواسی میں

غزل میں قافیہ مجھ سے یہاں وہاں کا لگا

فسردہ شام تھی سو اس کے گھر بسر کر دی

جب اس کا حسن عمل مجھ کو میزباں کا لگا

اگر ملی بھی کبھی دھوپ کی جھلک اس میں

تو پھر مزاج میں عاطرؔ وہ سائباں کا لگا