وہ آدمی تو حسیں ہے بھلا بھلا سا ہے

وہ آدمی تو حسیں ہے بھلا بھلا سا ہے

غموں کی دھول سے چہرہ اٹا اٹا سا ہے

فصیل شہر سے آگے نہ جائیے گا ابھی

غلیظ خون کا دریا چڑھا چڑھا سا ہے

گراں نہ گزرے مجھے سوکھتے ہوئے لمحے

دلوں میں پیار کا جذبہ لٹا لٹا سا ہے

میں اپنے گاؤں میں جاؤں تو کون پہچانے

مہکتے خون کا رشتہ بجھا بجھا سا ہے

میں چاہتا ہوں مقدس زمین کی خوشبو

پر آسماں مری جانب جھکا جھکا سا ہے

کہاں گئے تری سانسوں کے نرم نخلستاں

یہ میرے جسم کا صحرا تپا تپا سا ہے